நயன்தாரா மாதிரி!

திரைப்பட பாடலாசிரியர் பா விஜயின் ஸ்டைலில் அடுத்து கதாநாயகனாக அறிமுகமாகும் சினிமா கவிஞர் சினேகன். ஏற்கெனவே அமீர் படத்தில் கேரக்டர் ரோலில் நடித்து, டான்ஸ், காமெடி என கலக்கிய சினேகன் இப்போது உயர்திரு 420ஆக அவதாரம் எடுத்து நிற்கிறார். நயன்தாராவின் ஜெராக்ஸ் காப்பி என்று சொல்லப்படும் கர்நாடகப் பைங்கிளி மேக்னா ராஜ்தான் படத்தின் கதாநாயகி.

இயக்குனர் இமயம் பாரதிராஜாவிடம் உதவி இயக்குனராக பணிபுரிந்த பிரேம்நாத் உயர்திரு 420இன் இயக்குனராக பரிணமித்து இருக்கிறார். ஆக்ஷன், காதல், சென்டிமென்ட் கலந்த ஜனரஞ்சகமான படமாக உயர்திரு 420 உருவாகி வருவதாகக் கூறுகிறார்கள்.

படத்தின் சில காட்சிகள்...

ராதாவின் எதிர்பார்ப்பு

நீண்ட நாட்களாக திரைக்குவரும் என்று எதிர்பார்க்கப்பட்டு இன்னு வராமலேயே இருக்கும் படம் கோ. ஜீவாவுக்கு ஜோடியாக நடிகை ராதாவின் மகள் கார்த்திகா இந்தப் படத்தில் அறிமுகமாகிறார்.

காதலர் தினத்தில் வெளிவருவதாகப் பேசப்பட்ட ’கோ’ உலகக் கோப்பை போட்டிகளுக்குப் பிறகு ஏப்ரல் மாதம் 14-ம் தேதி வெளிவரலாம் என்று கூறப்பட்டது. அதை உறுதி செய்வதுமாதிரி படத்தின் தயாரிப்பாளர் உதயநிதி ஸ்டாலின், ஏப்ரல் 14 அன்று படம் திரைக்கு வரும் என்று டுவிட்டரில் செய்தி வெளியிட்டு இருந்தார். ஆனால், ஏப்ரல் 14 அன்றும் வெளிவருகிறமாதிரி எந்த அறிகுறியும் இல்லை.

‘விண்ணைத் தாண்டி வருவாயா’, ‘மதராசபட்டினம்’, ‘பாஸ் என்கிற பாஸ்கரன்’, ‘மைனா’ படங்களுக்குப் பிறகு கோ படத்தை வெளியிட்டு வெற்றிப்படமாக்க வேண்டும் என்று திட்டமிட்டு இருந்தார் உதயநிதி, ஆனால், பின்னணி இசை அமைப்பதில் ஹாரிஸ் ஜெயராஜ் காலம்தாழ்த்தி வருவதாகக் கூறப்படுகிறது. அந்தப் பணி எந்தநிலையில் இருக்கிறது என்பதும் தெரியவில்லை. 

அதனால், ராதாவும் அவர் ரசிகர்களும் ஆவலோடு எதிர்பார்க்கும் கோ படம் எப்போது வெளியாகும் என்பது இதுவரை சஸ்பென்ஸாகவே இருக்கிறது.

கோ படத்தின் சில காட்சிகள்...

பத்து சீமான்களின் வேலையைச் செய்த தங்கபாலு!

மயிலாப்பூர் சட்டமன்ற உறுப்பினராக இருக்கும் எஸ்.வி.சேகர் தன்னுடைய சொத்துக்கணக்கை தாமாகவே சென்று தலைமை தேர்தல் அதிகாரி பிரவீன்குமாரிடம் அளித்தார். கடந்த 5 ஆண்டுகளில் மனைவி மற்றும் தன்னுடைய வருமானம் பற்றிய வருமானக் கணக்கை தேர்தல் ஆணையரிடம் அளித்தார். அரசியல் வட்டாரத்தில் ஆச்சரியத்தை உண்டாக்கிய இந்தச் செயல் பற்றி எஸ்.வி. சேகரிடமே கேட்டோம்.

எதற்காக திடீரென்று தேர்தல் ஆணையரை சந்தித்து சொத்துக்கணக்கு கொடுத்தீர்கள்..?

தலைமைத் தேர்தல் அதிகாரி பிரவீன்குமாரும் இப்படித்தான் கேட்டார். ‘நீங்கள்தான் போட்டியிடவில்லையே, எதற்காக என்னிடம் கொடுக்கிறீர்கள்’ என்று கேட்டார்? எம்எல்ஏ ஆகும்போது சொத்துக்கணக்கை தாக்கல் செய்த மாதிரிதான் இப்பவும் கொடுத்து இருக்கிறேன். இந்தத் தேர்தலில் நான் போட்டியிடவில்லை. அதனால், கடந்த 5 ஆண்டுகளில் என்னுடைய வருமானம், என் மனைவியுடைய வருமானம் மற்றும் எங்கள் சொத்து மதிப்புகளைப் பற்றிய எல்லா ஆவணங்களையும் பிரவீன்குமாரிடம் கொடுத்தேன். தேர்தலில் நிற்கவில்லை என்பதற்காக கடந்த 5 ஆண்டுகள் 100 கோடி ரூபாய் சம்பாதித்துவிட்டு ஓடிவிடலாமா? எல்லோருமே இப்படி தங்கள் சொத்துக் கணக்கைத் தாக்கல் செய்யவேண்டும். ஆனால், யாரும் செய்வது இல்லை. செய்யவேண்டும் என்று விதியும் இல்லை. ஆனால், நான் செய்திருக்கிறேன். நான் எம்.எல்.ஏவாக இருக்கும்போது பதவியைப் பயன்படுத்தி எதையும் சம்பாதிக்கவில்லை என்பதை சொல்வதற்காகத்தான் அப்படிச் செய்தேன். எல்லாருக்கு முன்மாதிரியாக இருக்க விரும்புகிறேன்.

சொத்துக்கணக்கு தாக்கல் செய்தபோது...

காங்கிரஸ் வேட்பாளராக போட்டியிடுவதற்கு மனு கொடுத்து இருந்தீர்களே என்ன ஆனது?

ஆமாம் கொடுத்தேன். ஆனால், அது நடக்கக் கூடாது என்று எப்படியோ தடுத்துவிட்டார்கள். ஆனால், நான் யாரையும் குற்றம் சொல்லத் தயாராக இல்லை. தார்மீக அடிப்படையில் கேட்டேன்; கொடுக்கவில்லை. ஆனால், எனக்கு காங்கேயத்தில் ஒதுக்கியிருப்பதாக தகவல் வந்தது. அது நடக்கும் என்று இருந்தேன். ஆனால், வேட்பாளரை அறிவிப்பதற்கே இழுபறி நீடித்து வந்ததால் என்னால் ஒன்றும் செய்ய முடியவில்லை. ஆனால், இப்போது தொகுதிக்கே சம்பந்தம் இல்லாத தங்கபாலு போட்டியிடுகிறார். தங்கபாலு யார் என்றுகூட மக்களுக்குத் தெரியாது. மெகா டிவி வெச்சிருக்காங்களே அந்த அம்மாவோட புருஷனா... வேட்புமனு நிராகரிச்சாங்களே அந்த அம்மாவோட புருஷனா... என்றுதான் மக்கள் கேட்கிறார்கள். இதனால் எனக்கு ஒன்றும் நஷ்டம் இல்லை; காங்கிரஸுக்குத்தான் நஷ்டம். 10 சீமான் செய்ய வேண்டிய வேலையை தங்கபாலுவே செய்துவிட்டார்.

விருப்பமனு தாக்கல் செய்தபோது...

தலைவரே மாற்று வேட்பாளர் என்பது கேலிக்குரியதாகிவிட்டதே?

ஒரு கட்சித் தலைவர் டம்மி புருஷனாக இருக்கலாம்; ஆனால், டம்மி வேட்பாளராக இருக்கக் கூடாது. ஆனால், தங்கபாலு டம்மி வேட்பாளராக இருக்கிறார் என்றால் என்ன சொல்வது. (சிரிக்கிறார்)

எதற்காக வேட்பாளர் அறிவிப்பில் இழுபறி நீடித்து வந்தது?

எல்லாரிடமும் பணம் வாங்கிக்கொண்டு யாரை அறிவிப்பது, யாரை தவிர்ப்பது என்று தெரியாமல் குதிரை பேரம் நடத்திக்கொண்டு இருந்தார்கள். அதுதான் காரணம். இதுபற்றி ஏற்கெனவே ராகுல்காந்தியிடம் பேசியிருக்கிறேன்.

என்ன பேசினீர்கள்?

தேர்தலுக்கு 3 மாதங்களுக்கு முன்பாகவே எல்லாத் தொகுதிகளிலும் தகுதியுடையவர்களை பட்டியலிட்டு வைத்துக்கொண்டு, கூட்டணி பிரச்னை, இட ஒதுக்கீட்டுப் பிரச்னை எல்லாம் தீர்ந்தபிறகு ஏற்கெனவே முடிவுசெய்து வைத்திருப்பவர்களை வேட்பாளராக அறிவிக்கலாம் என்று கருத்து தெரிவித்து இருந்தேன். அப்படி செய்திருந்தால், இந்த இழுபறிக்கு இடமே இல்லாமல் இருந்திருக்கும். ஆனால், அதை கீழ்மட்டத்தில் இருப்பவர்கள் தடுத்துவிட்டார்கள். அதுமட்டும் இல்லாமல், டெல்லியில் உள்ள தலைவர்களின் மனநிலையே வேறு. தமிழ்நாட்டில் தலைமையில் இருப்பவர்கள் என்ன சொல்கிறார்களோ அதைத்தான் அவர்கள் கேட்பார்கள். அதனால்தான் இப்படியெல்லாம் நடக்கிறது. தேர்தல் முடிந்ததும் தங்கபாலுவை தலைவர் பதவியில் இருந்தே தூக்கினாலும் தூக்கிவிடுவார்கள்!

தங்கபாலு வேண்டுமென்றே சதி செய்துதான் தன் மனைவியை வேட்பாளராக அறிவித்து, இப்போது தானே போட்டியிடுகிறார் என்று கூறுகிறீர்களா..?

அவர் சதி செய்தார் என்று சொல்லவில்லை. ஆனால், ஒரு கட்சித் தலைவர் எப்படி நடந்துகொள்ளக் கூடாது என்பதற்கு முன்மாதிரியாகத் திகழ்கிறார் தங்கபாலு. இவருடைய நடவடிக்கையால் கட்சிக்குத்தான் மரியாதைக் குறைவு ஏற்பட்டு இருக்கிறது.

தங்கபாலு நடவடிக்கையால் மயிலாப்பூரில் காங்கிரஸ் ஜெயிக்காது என்று சொல்கிறீர்களா..?

நான் அப்படி சொல்லவில்லை. வெறும் பிராமணர்கள் மட்டும் இருக்கிற தொகுதி இல்லை மயிலாப்பூர். இங்கே குடிசைவாழ் மக்கள் இருக்கிறார்கள்; மீனவ மக்கள் இருக்கிறார்கள்; படித்தவர்கள் - படிக்காதவர்கள் என்று எல்லாதரப்பு மக்களும் வசிக்கிறார்கள். தங்கபாலு இப்படி நடந்துகொண்டதால், காங்கிரஸ் மீது மக்களுக்கு இருந்த நம்பிக்கையே போய்விட்டது. அதுவும் இல்லாமல் குரங்கு கையில் கிடைத்த அப்பம் மாதிரிதான் மயிலாப்பூர் நிலைமை இருக்கிறது. பொதுவாக வேட்புமனு தாக்கல் செய்யும்போது வழக்கறிஞர், ஆடிட்டர் எல்லாரையும் வைத்து மனுவை பரிசீலனை செய்துதான் பூர்த்தி செய்து கொடுப்பார்கள். அப்படி எதுவுமே செய்யாமல் தங்கபாலு இப்படி செய்திருப்பது வேடிக்கையாக இருக்கிறது. ஒரு தலைவருக்கு வேண்டிய எந்தத் தகுதியும் அவரிடம் இல்லை. யார் கையில் கிடைக்கக் கூடாதோ, அங்கே மயிலாப்பூர் தொகுதி போயிருக்கிறது.

பொதுவாக இந்தத் தேர்தலில் திமுக - காங்கிரஸ் கூட்டணி வெற்றி பெறும் என்று சொல்கிறீர்களா?

திமுக - காங்கிரஸ் கூட்டணிதான் வெற்றிபெறும். தேர்தலில் நிற்பவர்கள் வெற்றி பெறுவதற்காகத்தானே போட்டியிடுகிறார்கள். தோற்பதற்காக யாரும் போட்டியிடமாட்டார்கள். அதனால், இந்தக் கூட்டணி தோற்கும் என்று நான் எப்படி சொல்வேன். எப்பவும் நெகடிவாக யோசிக்கக் கூடாது. ஆனால், மக்கள் மனநிலையை யாராலும் கணிக்க முடியாது. எதுவேண்டுமானாலும் நடக்கலாம்!

திமுக தலைவர் கருணாநிதியை சந்தித்து என்ன பேசினீர்கள்?

மரியாதை நிமித்தமாகத்தான் சந்தித்து அவரிடம் ஆசிபெற்றேன். அவர்கூட சொன்னார், ‘என்னாய்யா உனக்குத்தான் கிடைக்கும்னு நினைச்சேன். இப்படி ஆகிவிட்டதே...’ என்றார். நான் என்ன சொல்வது.

கருணாநிதியை சந்தித்தபோது...

அதிமுகவில் இருந்திருந்தால் சீட் கிடைத்திருக்கும் என்று நினைக்கிறீர்களா?

நிச்சயமாகக் கிடைத்திருக்கும். ஆனால், அதை வேண்டாம் என்று நான் மறுத்திருப்பேன். காங்கிரஸில் எனக்கு எம்.எல்.ஏ சீட் கிடைக்கவில்லை என்றால் என்ன? எம்பி.யாக வேண்டும் என்று என் ஜாதகத்தில் எழுதியிருக்கும். அதனால், நான் எம்.பியாக ஆனாலும் ஆச்சரியப்படுவதற்கு இல்லை. எப்பவும் உயர்வாக சிந்திக்க வேண்டும். எம்.எல்.ஏ பதவி போயிடுச்சேன்னு அழக்கூடாது. பதவிக்காக ஆசைப்படுற ஆள் நான் கிடையாது. அப்படி இருந்திருந்தால், திமுகவில் போய் சேர்ந்திருப்பேனே!

பலே பாசிட்டிவ் யோசனைதான்

பேட்டி: சா.இலாகுபாரதி

தெனாலி.காம்

பேருந்து கிடைக்காமல் மக்கள் அவதி

வாக்களிப்பதற்காக சென்னையிலிருந்து சொந்த ஊருக்குப் போவதற்காக, கோயம்பேடு பேருந்து நிலையத்தில் மக்கள் குவிந்தனர். சிறப்புப் பேருந்துகள் இல்லாததால் கூட்டநெரிசலில் சிக்கி மக்கள் அவதிப்பட்டு வருகின்றனர்.

எந்த முறையும் இல்லாத அளவுக்கு இந்த முறை தமிழகத் தேர்தல் பெரும் எதிர்பார்ப்புக்கு உள்ளாகியிருக்கிறது. அதனால், தேர்தலில் வாக்களிப்பதற்காக பெரும்பான்மையான மக்கள் காத்துக்கிடக்கிறார்கள். பணி நிமித்தமாக சொந்த ஊரில் இருந்து சென்னை வந்து வேலை செய்யும் பலர் வோட்டு போடுவதற்காக பஸ் பிடித்தி ஊருக்குத் திரும்ப கோயம்பேடு பேருந்து நிலையத்தில் குவிந்தனர். 

இதனால், செவ்வாய் அன்று (ஏப்ரல் 12) இரவு கோயம்பேடு பேருந்து நிலையம் மக்கள் நெரிசலில் மூழ்கியது. பேருந்தில் ஏறுவதற்குக் கூட இடம் இல்லாமல் 100 அடி சாலையில் மக்கள் நடந்தபடியே இருந்தனர். சிலர் லாரிகளிலும், பலர் சரக்கு வாகனங்களிலும் ஏறி பயணித்தனர். டாடா குட்டி யானை ஓட்டுனர்கள் இதைப் பயன்படுத்திக்கொண்டு பயணிகளிடம் வசூல் வேட்டை நிகழ்த்தத் தொடங்கிவிட்டனர். விழுப்புரம் - ரூ.200, திருவண்ணாமலை - ரூ.200, திருச்சி - ரூ.375, கும்பகோணம் - ரூ.350, மதுரை - ரூ.500 என்று வசூல் வேட்டை தொடர்கிறது.

அரசு போக்குவரத்துத் துறை சிறப்புப் பேருந்துகளுக்கு சரியான ஏற்பாடு செய்யாததால் மக்கள் இப்படி பெரும் அவதிக்கு ஆளாகி வருகிறார்கள்.

நிர்வாணம் இல்லையா? பூனம் பாண்டே பேட்டி

இந்திய அணி உலகக் கோப்பையை வெல்ல என்ன வேண்டுமானாலும் செய்ய நான் தயார். நிர்வாணமாக காட்சி தரவும் நான் தயார் - இந்தியா உலகக் கோப்பையை வெல்வதற்கு முன் இப்படித்தான் அறிவித்து இருந்தார் இந்தி நடிகை பூனம் பாண்டே.

இந்த நிலையில் இந்தியாவும் இறுதிப்போட்டியில் வெற்றி பெற்று, உலகக் கோப்பையை கைப்பற்றிவிட்டது. ஆனால் பூனம்தான் பூரண நிர்வாணத்துக்கு தாவவில்லை. இதுபற்றி பத்திரிகைகளிலும் இணையதளங்களிலும் மாய்ந்து மாய்ந்து எழுதிவிட்டனர். ஆனால், அதுகுறித்து தற்போதுதான் பூனம் விளக்கம் ளித்துள்ளார்.

இதுகுறித்து பத்திரிகையாளர்களுக்கு பூனம் பாண்டே அளித்த ஒரு பேட்டி:

பத்திரிகையாளர்: இந்தியா கோப்பையை வென்றதும் உங்களை எங்கேயுமே பார்க்க முடியவில்லை... நீங்களும் நிர்வாணமாகவில்லையே ஏன்?

பூனம் பாண்டே: என்னுடைய உயிருக்கு ஆபத்து ஏற்படும் என்று பயந்துதான் தனியாக ஓர் இடத்தில், வீரர்களுக்கு மட்டும் நிர்வாணமாகக் காட்சியளிக்க அனுமதிக்குமாறு கிரிக்கெட் வாரியத்துக்கு ஒரு கடிதம் அனுப்பினேன். ஆனால் அதை பிசிசிஐ ஏற்கவில்லை. என்னால் நடு ரோட்டில் நிர்வாணமாக ஓடமுடியாது. அது குற்றம். (பேசும்போது அது தெரியவில்லையாக்கும்.)

உண்மையில் நான் வேடிக்கைகாகத்தான் அப்படிச் சொன்னேன். ஆனால் பலரும் அதை சீரியஸாக எடுத்துக்கொண்டு, என்னை மிரட்டினர். அதனால், செல்போனைக் கூட சுவிட்ச் ஆஃப் செய்துவிட்டேன். அடுத்து என்ன செய்வது என்று தெரியாமல் விழித்துக்கொண்டு இருந்த நிலையில்தான் என் மீது நீதிமன்றத்தில் வழக்குத் தொடர்ந்து விட்டனர். இதனால்தான் நான் தலைமறை வானேன். ஆனால், மும்பையை விட்டு எங்கும் ஓடவில்லை.

பத்திரிகையாளர்: அப்படியானால் நீங்கள் விளம்பரத்துக்காகத்தான் அப்படி பேசினீர்களா..?

பூனம்: அப்படிச் சொல்லமுடியாது. நான் ஒரு டிவி சேனலுக்காக நிர்வாணமாக போஸ் கொடுத்துள்ளேன். ஒரு பத்திரிக்கையின் அட்டைப் படத்துக்காக என்னை நிர்வாணமாக போஸ் கொடுக்கக் கேட்டனர். பல கோடி ரூபாய் தருவதாகவும் கூறினர். ஆனால் அப்படிச் செய்தால் அது பப்ளிசிட்டி என்பதால் அதை நான் ஏற்கவில்லை. ஆனால், இப்போது இந்த விவகாரத்தால் எனக்கு ஒரு திரைப்படமும், நிறைய டிவி ஷோ வாய்ப்புகளும் கிடைத்துள்ளன.

பத்திரிகையாளர்: அதுசரி, இந்த சமாச்சாரத்தால் உங்களுடைய லவ்வர் பாய் ஓடிட்டாராமே?

பூனம்: ரொம்ப சந்தோஷமாக இருக்கிறேன், சிங்கிளாகத்தான் இருக்கிறேன். என்னுடைய தனிப்பட்ட வாழ்க்கை பற்றி நான் பேச விரும்பவில்லை.

ஐயோ... ஐயோ...

விண்வெளி வீரர் யூரி கெகாரின்

ரஷ்ய விண்வெளி வீரர் யூரி கெகாரின் விண்வெளியில் கால் பதித்து இன்றோடு (2011 ஏப்ரல் 12) 50 ஆண்டுகள் ஆகின்றன. இதேநாள் 1961ஆம் ஆண்டு யூரி கெகாரின் விண்வெளியில் கால் பதித்து சாதனைப் படைத்தார். விண்வெளிக்குச் சென்றுவந்த முதல் மனிதன் யூரி கெகாரிதான்.

யூரி கெகாரின்

கெகாரின் விண்வெளியில் கால் பதித்து இன்றோட 50 ஆண்டுகள் நிறை வடைவதை ரஷ்யா ஆரவாரத்தோடு கொண்டாடிவருகிறது. 

1961க்கு முன்புவரை மனிதர்கள் யாரும் விண்வெளிக்கு சென்றதில்லை. ரஷ்யாதான் முதன் முறையாக இந்தச் சாதனையை நிகழ்த்திக் காட்டியது. ரஷ்யாவின் சாதனையைப் பார்த்து அமெரிக்கா வாய்மேல் விரல் வைத்து வேடிக்கைப் பார்த்தது. விண்வெளிக்கு சென்றது மட்டும் இல்லாமல், பூமியையும் சுற்றி வந்து யூரி கெகாரின் சாதனைப் படைத்தார்.

கடந்த 50 ஆண்டுகளில் 500க்கும் அதிகமான விண்வெளி வீரர்கள் விண்வெளிக்குச் சென்று திரும்பியிருந்தாலும்,இதற்கெல்லாம் முன்னோடியாக கெகாரினின் விண்வெளிப் பயணத்தை, ரஷ்யா கொண்டாடி வருகிறது. கிரம்லின் மாளிகையில் ஐம்பது துப்பாக்கி வேட்டுச்சத்தங்களுடன் இந்த நாள் நினைவு கூறப்பட்டது.

இந்த கொண்டாட்டங்களின் ஒரு பகுதியாக, விண்வெளியில் அமைந்துள்ள சர்வதேச விண்வெளி ஆராய்ச்சி மையத்தில் இருக்கும் வானியலாளர்களுடன் வீடியோ கான்ஃபரன்சிங் மூலம் பேசிய ரஷ்ய அதிபர் டிமித்ரி மெத்வதேவ், விண்வெளி ஆராய்ச்சி என்பது ரஷ்யாவின் முன்னணி இலக்குகளில் ஒன்றாகத் திகழ்வதாக தெரிவித்தார். இதற்கு தேவைப்படும் நிதி ஒதுக்கீடுகளை ரஷ்யா செய்யும் என்றும் கூறினார்.

கெகாரின் தன்னந்தனியாக ஒற்றையடிப்பாதையில் மேற்கொண்ட விண்வெளிப் பயணம் இன்று பலருக்கும் நெடுஞ்சாலையை அமைத்துக் கொடுத்திருக்கிறது. விண்வெளி ஆராய்ச்சியில் கெகாரின் ஒரு மைல்கல்.

சிந்திப்பீர்! செயல்படுவீர்!

ஏப்ரல் 13: தமிழகத்தின் தலையெழுத்தை மாற்றப்போகிற தினம். நம்மை ஆளப்போகிறவரை தேர்ந்தெடுக்கிற நாள். யாரைத் தேர்ந்தெடுத்தால் மக்கள் பிரச்னைகள் தீரும் என்று தீர்மானிக்கக் கூடிய நிலையில் தமிழக அரசியல் நிலை இல்லை. ஒருத்தர் அயோகியன் என்றால், இன்னொருத்தர் பரம அயோகியனாக இருக்கிறார். அதனால், பரம அயோக்கியனைவிட அயோகி யனை தேர்ந்தெடுப்பதே மேல் என்ற முடிவை எடுக்கவேண்டிய நிலைக்கு தள்ளப்பட்டு இருக்கிறோம்.

நம்முடைய வரிப்பணத்தை அரசுக்கு செலுத்துகிறோம். நம்முடைய வரிப் பணத்தில் இருந்துதான் தேர்தல் நடக்கிறது; அரசியல்வாதிகளின் கொள்ளை நடக்கிறது. நம்முடைய வரியிலிருந்துதான் நமக்கு வேண்டிய தேவைகளை அரசு நிறைவேற்றுகிறது.சில அரசியல்வாதிகள் அவர்களுடைய தேவை களையும் நமது வரி பணத்திலிருந்தே நிறைவேற்றிக் கொள்கிறார்கள். ஆகவே நம்முடைய பணத்தை செலவழிக்கிற அதிகாரத்தை வேறொருவரிடம் கொடுக் கப்போகிற தினம் ஏப்ரல் 13.

ஒருநாள் இன்பத்துக்காக அரசியல் தரகர்களிடம் பணம் வாங்கிக்கொண்டு, 5 ஆண்டு காலம் அல்லல்பட வேண்டாம்.

• கடந்த காலங்களில் யார் மக்களுக்கு நன்மை செய்திருக்கிறார்கள்?
• யார் மக்களுக்கு தீங்கு விளைவித்து இருக்கி றார்கள்?
• யார் மக்களை பிச்சையெடுக்க வைத்திருக்கிறார்கள்?
• விலைவாசி பிரச்னைகளுக்கு யார் காரணம்?
• பெட்ரோல் விலை உயர்வுக்கு யார் காரணம்?
• இலங்கைத் தமிழர் படுகொலைகளுக்கு யார் காரணம்?
• ரௌடிகள் அட்டகாசத்துக்கு யார் காரணம்?
• எல்லா துறைகளிலும் மக்களைச் சுரண்டும் ஆட்சி யாருடைய ஆட்சி?
•  நடிகர்களை காட்டி மக்களை ஏமாற்றி வருகிறவர்கள் யார்?
• எந்த அரசியல் தலைவர் சிறந்த நடிகராக மக்களை ஏமாற்றுகிறார்?
• எந்த நடிகர் சிறந்த அரசியல் தலைவராக இருந்து மக்களுக்கு சேவை ஆற்றுவார் என்று நீங்கள் நினைக்கிறீர்கள்?

இப்படி பல்வேறு கேள்விகளை உங்களை நீங்களே கேட்டுக்கொண்டு பதில் தேடுங்கள். அப்போது, எந்த ஆட்சியாளரைத் தேர்ந்தெடுக்க வேண்டும் என்பது தெரியும்.

ஏப்ரல் 13 உங்கள் தலையெழுத்தை நீங்களே நிர்ணயிக்கும் நாள்!

நம்மை ஆளப்போகிறவரை தேர்ந்தெடுப்பது நம் உரிமை! வாக்களிப்பது நம் கடமை!

சிந்திப்பீர்! செயல்படுவீர்!

விஜய் - விக்ரம் - கலக்கப்போவது யாரு?

ராவணன் படத்துக்குப் பிறகு விக்ரம் வித்தியாசமான வேடத்தில் கலக்கும் படம் தெய்வத் திருமகன். மதராசப்பட்டினம் படத்தின் இயக்குனர் விஜய்தான் இந்தப் படத்தையும் இயக்கியிருக்கிறார். வழக்கம்போலவே விஜய் படத்துக்கு ஜி.வி.பிரகாஷ் இசையமைத்து இருக்கிறார்.

அனுஷ்கா, அமலாபால் என்று டாப் ஹீரோயின்கள் இணைந்திருக்கிறார்கள். இவர்களோடு நாசர், எம்.எஸ்.பாஸ்கர் உட்பட பலர் நடித்தி இருக்கிறார்கள். விஜய்+விக்ரம் காம்பினேஷன் ஒர்க்கவுட் ஆகும் என்று எதிர்பார்க்கலாம். காரணம் படத்தில் விக்ரம் சின்ன பையனாக பின்னியெடுத்திருக்கிறாராம்!

படத்தின் ட்ரைலரை கூட அதே உத்தியில்தான் எடுத்திருக்கிறார்கள். டிரைலரை பார்க்கும்போதே படம் பார்க்க வேண்டும் என்ற ஆவல் எழுகிறது என்றால் படத்துக்கு எதிர்பார்ப்பு எப்படி இருக்கும் என்று சொல்லத் தேவையில்லை. விஜய் + விக்ரம் கூட்டணி கலக்கல் கூட்டணியாக அமையும் என்று நம்பலாம்.

இந்தப் படத்தின் சில காட்சிகள்...